ലേഡി സൂപ്പര്‍ സ്റ്റാർ നയൻതാരയ്ക്ക് ഇന്ന് പിറന്നാള്‍
തെന്നിന്ത്യയുടെ ലേഡി സൂപ്പര്‍ സ്റ്റാര്‍ എന്ന വിശേഷണം സ്വന്തമാക്കിയ താരമാണ് നയന്‍താര. 1984 നവംബര്‍ 18ന് പത്തനംതിട്ട ജില്ലയിലെ തിരുവല്ലയില്‍ ജനിച്ച നയന്‍താരയുടെ യഥാര്‍ത്ഥ പേര് ഡയാന മറിയം കുര്യന്‍ എന്നാണ്. 2011 ഓഗസറ്റ് 7ന് ആര്യസമാജത്തില്‍ നിന്നും ഹിന്ദുമതം സ്വീകരിച്ച താരം നയന്‍താര എന്ന പേര് ഔദ്യേഗികമായി സ്വീകരിക്കുകയായിരുന്നു.
തിരുവല്ല വാലികാമഠം ഹൈസ്‌ക്കൂളിലും മാര്‍ത്തോമ കോളേജ് എന്നിവിടങ്ങളിലുമായി പഠനം പൂര്‍ത്തിയാക്കിയ നയന്‍താര കൈരളി ടിവിയിലെ ഫോണ്‍ ഇന്‍ പ്രോഗ്രാമിലൂടെയാണ് ദൃശ്യമാധ്യമ രംഗത്തേയ്ക്ക് എത്തിയത്. ജയറാമിനെ നായകനാക്കി സത്യന്‍ അന്തിക്കാട് സംവിധാനം ചെയ്ത മനസ്സിനക്കരെ എന്ന ചിത്രത്തിലാണ് ആദ്യമായി അഭിനയിച്ചത്. അരങ്ങേറ്റം ശ്രദ്ധേയമായതോടെ മോഹന്‍ലാലിനെ നായകനാക്കി ഷാജി കൈലാസ് സംവിധാനം ചെയ്ത നാട്ടുരാജാവ് എന്ന ചിത്രത്തില്‍ സഹനടിയായി വേഷം ലഭിച്ചു.
ഫാസില്‍ സംവിധാനം ചെയ്ത വിസ്മയത്തുമ്പത്ത് എന്ന ചിത്രത്തിലെ നയന്‍താരയുടെ പ്രകടനവും ശ്രദ്ധിക്കപ്പെട്ടു. തുടര്‍ന്ന് തസ്‌കരവീരന്‍, രാപ്പകല്‍ എന്നീ ചിത്രങ്ങളില്‍ അഭിനയിച്ചു. പിന്നീട് തമിഴ്, തെലുങ്ക് ഭാഷകളിലേയ്ക്ക് ചേക്കേറിയതോടെ നയന്‍താരയുടെ കരിയര്‍ ഗ്രാഫ് ഉയര്‍ന്നു. ചന്ദ്രമുഖി, ഗജിനി, ബില്ല, യാരടി നി മോഹിനി, ഇരുമുഖന്‍, അയ്യാ തുടങ്ങിയ തമിഴ് ചിത്രങ്ങളില്‍ അഭിനയിച്ചു.
തമിഴില്‍ അന്ന് മുന്‍നിരയില്‍ നിന്നിരുന്ന തൃഷ, ശ്രിയ ശരണ്‍, പൂജ തുടങ്ങിയ നായികമാര്‍ക്ക് വെല്ലുവിളിയായിരുന്നു നയന്‍താരയുടെ വളര്‍ച്ച. ഇതിനിടെ ഗോസിപ്പ് കോളങ്ങളിലും നയന്‍താരയുടെ പേര് നിറഞ്ഞു. പ്രഭുദേവ, ചിമ്പു തുടങ്ങിയവരുടെ പേരിനൊപ്പമാണ് നയന്‍താരയുടെ പേരും കൂട്ടിച്ചേര്‍ത്തത്. പിന്നീട് സംവിധായകന്‍ വിഘ്നേഷ് ശിവനുമായി നയന്‍താര പ്രണയത്തിലാകുകയായിരുന്നു. തന്നേക്കാള്‍ പ്രായക്കുറവുള്ള വിഘ്‌നേഷുമായുള്ള നയന്‍താരയുടെ ബന്ധവും വിവാദത്തിലായിരുന്നു. ഈ വര്‍ഷം ജൂണ്‍ 9ന് ചെന്നൈക്കടുത്ത് മഹാബലിപുരത്തെ പാര്‍ക്ക് ഷെറാട്ടണില്‍ നടന്ന നയന്‍താരയുടെയും വിഘ്നേഷ് ശിവന്റെയും വിവാഹം സ്വപ്നതുല്യമായിരുന്നു. അതീവ സുരക്ഷാവലയത്തിലായിരുന്നു വിവാഹം.
വാടക ഗര്‍ഭധാരണത്തിലൂടെ മാതാപിതാക്കളായ വിവരം നയന്‍താരയും വിഘ്‌നേഷും പങ്കുവെച്ചതോടെ വീണ്ടും വിവാദങ്ങളുണ്ടായി. വിഷയവുമായി ബന്ധപ്പെട്ട് തമിഴ്‌നാട് സര്‍ക്കാര്‍ അന്വേഷണം ആരംഭിച്ചതും താരദമ്പതികള്‍ മറുപടി നല്‍കിയതുമെല്ലാം വലിയ വാര്‍ത്തയായിരുന്നു. പിന്നീട്, നായന്‍താരയുടെ വാടക ഗര്‍ഭധാരണം സംബന്ധിച്ച കേസില്‍ താരദമ്പതികളുടെ ഭാഗത്ത് വീഴ്ചകളുണ്ടായിട്ടില്ലെന്ന അന്വേഷണ റിപ്പോര്‍ട്ട് പുറത്തുവന്നതോടെയാണ് വിവാദങ്ങള്‍ അവസാനിച്ചത്. ഇതോടെ വിവാഹ ശേഷമുള്ള നയന്‍താരയുടെ ആദ്യ പിറന്നാളിന് ഇരട്ടി മധുരമായി ഇരട്ടക്കുഞ്ഞുങ്ങളുമുണ്ട്.