ഒക്ടോബർ 25ന് ഭാഗിക സൂര്യഗ്രഹണം ദൃശ്യമാകുന്ന ഇന്ത്യൻ നഗരങ്ങൾ

ലോകമെമ്പാടുമുള്ള രാജ്യങ്ങൾ ഒക്ടോബർ 25ന് നടക്കുന്ന ഭാഗിക സൂര്യഗ്രഹണം വീക്ഷിക്കാൻ തയ്യാറെടുത്ത് നിൽക്കുകയാണ്. ദേശീയ തലസ്ഥാനം ഉൾപ്പെടെ ഇന്ത്യയിലെ നിരവധി നഗരങ്ങളിൽ ഈ ആകാശ വിസ്‌മയം ദൃശ്യമാകും. അടുത്ത പത്ത് വർഷത്തേക്ക് ഇന്ത്യയിൽ നിന്ന് ഇത്തരത്തിലൊരു സൂര്യഗ്രഹണം കാണാനാകില്ല എന്നതാണ് ഇത്തവണത്തെ പ്രത്യേകത.

സൂര്യൻ, ചന്ദ്രൻ, ഭൂമി എന്നിവ കൃത്യമായി വിന്യസിക്കാതിരിക്കുകയും സൂര്യന്റെ ഉപരിതലത്തിന്റെ ഒരു ചെറിയ ഭാഗത്ത് ഇരുണ്ട നിഴൽ ഉള്ളതായി തോന്നുകയും ചെയ്യുന്നതാണ് ഭാഗിക സൂര്യഗ്രഹണം എന്ന പേരിൽ അറിയപ്പെടുന്നത്. ഒരു ഭാഗിക സൂര്യഗ്രഹണത്തിന് മൂന്ന് ഘട്ടങ്ങളുണ്ട്. തുടക്കവും, ഏറ്റവും കൂടുതൽ ദൃശ്യമാവുന്നതും, അവസാനവുമാണ് ഇത്.

ഗ്രഹണ സമയത്ത് ഇന്ത്യയിലെ ആളുകൾക്ക് സൂര്യന്റെ 43 ശതമാനം അവ്യക്തമായി കാണാൻ കഴിയും. എന്നാൽ സൂര്യന്റെ അൾട്രാവയലറ്റ് രശ്‌മികളിൽ നിന്ന് നിങ്ങളുടെ കണ്ണുകളെ സംരക്ഷിക്കാൻ ഗ്രഹണം വീക്ഷിക്കുന്നവർ സോളാർ ഗ്ലാസുകൾ ഉപയോഗികാണമെന്ന് വിദഗ്‌ധർ ഉപദേശിക്കുന്നു.

ഇന്ത്യയിൽ ഭാഗിക സൂര്യഗ്രഹണം ദൃശ്യമാകുന്ന നഗരങ്ങൾ ഏതൊക്കെ ?

കൊൽക്കത്തയിലെ എംപി ബിർള പ്ലാനറ്റോറിയം അറിയിച്ചതനുസരിച്ച് ഈ ഭാഗിക സൂര്യഗ്രഹണം സൂര്യാസ്തമയത്തിന് മുൻപായി കുറച്ച് മിനിറ്റ് മുതൽ ഒരു മണിക്കൂർ വരെ ഇന്ത്യയുടെ പടിഞ്ഞാറൻ, മധ്യ ഭാഗങ്ങളിൽ ദൃശ്യമാകും. പടിഞ്ഞാറൻ നഗരങ്ങളായ പോർബന്തർ, ഗാന്ധിനഗർ, മുംബൈ, സിൽവാസ, സൂറത്ത്, പനാജി എന്നിവിടങ്ങളിൽ ഗ്രഹണം ഒരു മണിക്കൂറിലധികം നീണ്ടുനിൽക്കും.

ഗുജറാത്തിലെ ദ്വാരകയിലാവും ഇത് ഏറ്റവും കൂടുതൽ സമയം ദൃശ്യമാകുക, 1 മണിക്കൂർ 45 മിനിറ്റ്. ന്യൂഡൽഹിയിൽ വൈകുന്നേരം 4.29 മുതൽ ഗ്രഹണം ദൃശ്യമാകും, വൈകുന്നേരം 5.30ഓടെ ഇത് പരമാവധിയിൽ എത്തും. 

പടിഞ്ഞാറൻ, മധ്യ ഇന്ത്യ എന്നിവിടങ്ങളിൽ ഇത് ദൃശ്യമാകുമെങ്കിലും, ഐസ്വാൾ, ദിബ്രുഗഡ്, ഇംഫാൽ, ഇറ്റാനഗർ, കൊഹിമ, സിൽച്ചാർ, ആൻഡമാൻ നിക്കോബാർ ദ്വീപ് തുടങ്ങിയ ഇന്ത്യയുടെ വടക്കുകിഴക്കൻ ഭാഗങ്ങളിൽ നിന്ന് ഗ്രഹണം കാണാൻ കഴിയില്ല. 2032 നവംബർ 3ന് മാത്രമേ ഇന്ത്യയിൽ അടുത്തതായി സൂര്യഗ്രഹണം ദൃശ്യമാകൂ എന്നതിനാൽ അപൂർവമായ ആകാശ വിസ്‌മയത്തിന് പ്രാധാന്യമേറെയാണ്.