ജിമ്മന്‍മാരേ, ക്ഷീണിതരെങ്കില്‍ ഇതു കേള്‍ക്കൂ…
ജിമ്മില്‍ പോകുന്നവരും വ്യായാമം ചെയ്യുന്നവരെല്ലാം ഓരോ ദിവസവും കൂടുതല്‍ സമയം ഇതിനായി ചെലവഴിക്കണമെന്നാഗ്രഹിക്കുകയും എന്നാല്‍ ക്ഷീണം മൂലം പിന്‍മാറുകയും തിരിച്ചുപോരുകയും ചെയ്യുന്നത് പതിവാണ്. വ്യായാമത്തിന് മുമ്പ് അവസാനമായി കഴിച്ച ഭക്ഷണമാണ് ഏറെക്കുറേ നമ്മളെ ഈ മാനസികാവസ്ഥയിലേക്കെത്തിക്കുന്നത്. അതുകൊണ്ട് നല്ല ജിമ്മനാകാന്‍ കുറച്ചുകാര്യങ്ങള്‍ ശ്രദ്ധിക്കാം.
- എപ്പോഴും വ്യായാമം ചെയ്യുന്നതിന്റെ രണ്ട് മണിക്കൂര്‍ മുമ്പ് ഭക്ഷണം കഴിക്കാന്‍ ശ്രദ്ധിക്കണം. കുറഞ്ഞത് 2 മണിക്കൂറിന്റെയെങ്കിലും വ്യത്യാസം വ്യായാമവും ഭക്ഷണവും തമ്മില്‍ വേണമെന്നര്‍ത്ഥം.
- തോന്നിയ ഭക്ഷണം തോന്നിയത് പോലെ കഴിക്കുന്നതും വ്യായാമത്തെ മോശമായി ബാധിക്കും. ഏതൊക്കെ ഭക്ഷണമാണ് ഉള്‍പ്പെടുത്തേണ്ടത് എന്ന് അറിഞ്ഞിരിക്കുക.
- ഉള്‍പ്പെടുത്തുന്ന ഭക്ഷണത്തില്‍ ബീറ്റ്റൂട്ട് മികച്ചൊരു തിരഞ്ഞെടുപ്പാണ്. ബീറ്റ്റൂട്ട് പച്ചയ്ക്ക് കഴിക്കുന്നതാണ് ഏറ്റവും നല്ലത്. പച്ചയ്ക്ക് കഴിക്കാന്‍ ബുദ്ധിമുട്ടുള്ളവര്‍ക്ക് ജ്യൂസാക്കി കഴിക്കാവുന്നതാണ്. രക്തം വര്‍ധിപ്പിക്കാന്‍ മാത്രമല്ല രക്തത്തിലെ ഓക്സിജന്റെ അളവ് വര്‍ധിപ്പിക്കാനും ഇത് സഹായിക്കും.
- ഏത്തപ്പഴത്തിലടങ്ങിയിരിക്കുന്ന സ്റ്റാര്‍ച്ച് ശരീരത്തിന് നല്ല തോതില്‍ ഊര്‍ജ്ജം പകരും. വ്യായാമത്തിന് 45 മിനുറ്റ് മുമ്പായി ഇടത്തരം വലിപ്പത്തിലുള്ള ഒരു ഏത്തപ്പഴം കഴിക്കുന്നത് വളരെ നല്ലതാണ്.
- വ്യായാമത്തിന് മുമ്പായി കഴിക്കാവുന്ന ഏറ്റവും നല്ല പഴമാണ് മാതളനാരങ്ങ. ഊര്‍ജ്ജോത്പാദനം മാത്രമല്ല, വ്യായാമത്തിന് ശേഷമുള്ള നെഞ്ചെരിച്ചിലിനും ഇത് നല്ലതാണ്.
- അതുപോലെ നട്സ് പ്രോട്ടീനിന്റെയും കൊഴുപ്പിന്റേയും കലവറയാണ്. ഇതും ശരീരത്തിന് ആവശ്യമായ സ്റ്റാമിന തന്നെയാണ് നല്‍കുക. കപ്പലണ്ടി, ബദാം, പിസ്ത തുടങ്ങിയവയോ അല്ലെങ്കില്‍ ഇവയില്‍ നിന്നുണ്ടാക്കുന്ന ഏതെങ്കിലും ബട്ടറോ വ്യായാമത്തിന് മുമ്പ് കഴിക്കാവുന്നതാണ്.
- യോഗര്‍ട്ട് എളുപ്പത്തില്‍ ദഹിക്കുകയും അതേസമയം ശരീരത്തെ തണുപ്പിച്ച് ഊര്‍ജ്ജം സംഭരിക്കുകയും ചെയ്യും. അതിനാല്‍ തന്നെ വ്യായാമത്തിന്റെ മുമ്പായി ഒരു കപ്പ് യോഗര്‍ട്ട് കഴിക്കുന്നതും നല്ലതാണ്.
ഇനി നന്നായി കഴിച്ച് 2 മണിക്കൂര്‍ കഴിഞ്ഞ് ജിമ്മിലേക്കു പൊയ്‌ക്കോളൂ… മസിലും ആരോഗ്യവും പെരുപ്പിക്കാം…