ഡെങ്കിപ്പനി പ്രതിരോധിക്കാന്‍ ഈ പാനീയങ്ങള്‍ വീട്ടിലുണ്ടാക്കാം…
ശൈത്യകാലം ആരംഭിച്ചതോടെ രാജ്യത്ത് ഡെങ്കിപ്പനി (Dengue) ബാധിതരുടെ എണ്ണം വര്‍ധിച്ചു. ഒക്ടോബറില്‍ മാത്രം ഡല്‍ഹിയില്‍ 1,200-ലധികം ഡെങ്കിപ്പനി കേസുകള്‍ റിപ്പോര്‍ട്ട് ചെയ്യപ്പെട്ടു.ഈഡിസ് ഈജിപ്തി കൊതുകുകളാണ് ഈ രോഗം മനുഷ്യരിലേക്ക് പകര്‍ത്തുന്നത്. ഇത് ഒരു വ്യക്തിയുടെ രക്തത്തിലെ പ്ലേറ്റ്ലെറ്റുകളുടെ എണ്ണം ഗണ്യമായി കുറക്കും. തല്‍ഫലമായി വേദനയും സന്ധി വേദനയും തലവേദനയുമൊക്കെയുണ്ടാകും. ഡെങ്കിപ്പനി രോഗികള്‍ കൂടുതല്‍ പോഷകാഹാരം കഴിക്കണം. ഇതോടൊപ്പം ശരീരത്തില്‍ ജലാംശം നിലനിര്‍ത്തേണ്ടത് പ്രധാനമാണെന്നും ന്യൂ ഡല്‍ഹിയിലെ പിഎസ്ആര്‍ഐ ഹോസ്പിറ്റലിലെ ഡയറ്ററ്റിക്‌സ് ന്യൂട്രിഷനിസ്റ്റ് ദേബ്ജാനി ബാനര്‍ജി പറയുന്നു. ഡെങ്കിപ്പനി രോഗികള്‍ ശരീരത്തില്‍ ജലാംശം നിലനിര്‍ത്തണം. ദിവസവും 4 ലിറ്റര്‍ വെള്ളം കുടിക്കണമെന്നും അവര്‍ പറഞ്ഞു. ഡെങ്കിപ്പനി പ്രതിരോധത്തിനായി കഴിക്കാവുന്ന ചില പാനീയങ്ങള്‍ നോക്കാം.
വേപ്പ് വെള്ളം: വേപ്പില വെള്ളത്തില്‍ തിളപ്പിച്ച് കുടിക്കുന്നത് നല്ലതാണ്. വേദന ശമിപ്പിക്കാനും ജലാംശം വര്‍ദ്ധിപ്പിക്കാനും ഇത് ദിവസവും ചായയ്ക്കൊപ്പം കുടിക്കാവുന്നതാണ്.
പപ്പായയുടെ ഇലകള്‍: രക്തത്തിലെ പ്ലേറ്റ്ലെറ്റുകളുടെ എണ്ണം വര്‍ധിപ്പിക്കാന്‍ കഴിയുന്ന ഒന്നാണിതെന്ന് പപ്പായയുടെ ഇലയെന്ന് ദേബ്ജാനി ബാനര്‍ജി പറഞ്ഞു. രണ്ട് പപ്പായ ഇലകള്‍ എടുത്ത് ചതച്ച് പിഴിഞ്ഞ് നീര് എടുക്കുക. ഈ മിശ്രിതത്തിലേക്ക് ഒരു കപ്പ് വെള്ളം ചേര്‍ക്കുക. കുടിക്കുന്നതിനുമുമ്പ് എല്ലായ്‌പ്പോഴും വെള്ളം അരിച്ചെടുക്കുക്കാനും ശ്രദ്ധിക്കുക.
പാവക്ക ജ്യൂസ്: ജ്യൂസ് പോലെ ഇത് കഴിക്കാം. ആദ്യം തൊലി കളഞ്ഞ് കഷ്ണങ്ങളാക്കുക. ഒരു ഗ്ലാസ് വെള്ളം ചേര്‍ത്ത് അരച്ചെടുത്ത കുടിക്കാം. മറ്റ് പച്ചക്കറികള്‍ക്കൊപ്പവും നിങ്ങള്‍ക്ക് ഇത് കഴിക്കാമെന്നും ദേബ്ജാനി ബാനര്‍ജി പറഞ്ഞു.
തുളസി: ചായയുടെ രൂപത്തിലാണ് തുളസി കഴിക്കേണ്ടത്. ഗ്രീന്‍ ടീ കഴിക്കുമ്പോള്‍, അതില്‍ തുളസിയും കൂടി യോജിപ്പിക്കുക. പക്ഷേ പാല്‍ ചേര്‍ക്കരുത്. തുളസി ഇലകള്‍ വെള്ളത്തില്‍ തിളപ്പിച്ച് അരിച്ചെടുക്കുക. ഇതില്‍ കുറച്ച് നാരങ്ങ നീരും ചേര്‍ത്ത് കുടിക്കാവുന്നതാണ്.
ജിലോയ് സസ്യം: ഇത് ഉപാപചയ നിരക്ക് വര്‍ദ്ധിപ്പിക്കുകയും പ്രതിരോധശേഷി മെച്ചപ്പെടുത്തുകയും ചെയ്യുന്നു. ഇല തിളപ്പിച്ച് വെള്ളം അരിച്ചെടുത്ത് ചായ പോലെ കുടിക്കുക. ഈ ഇല വിപണിയില്‍ നിന്ന് വാങ്ങി വീട്ടില്‍ തന്നെ തയ്യാറാക്കുന്നതാണ് നല്ലത്.
ഉലുവ: ജ്യൂസില്‍ ഉലുവ ചേര്‍ത്ത് കഴിക്കാവുന്നതാണ്.പ്രതിരോധശേഷി വര്‍ദ്ധിപ്പിക്കുന്നതിന് വിറ്റാമിന്‍ സിയുളള പപ്പായ, നെല്ലിക്ക, ഓറഞ്ച് ജ്യൂസ് എന്നിവ ഭക്ഷണത്തില്‍ ചേര്‍ക്കണം.
പ്ലേറ്റ്ലെറ്റ് എണ്ണം കൂട്ടാന്‍ മാതളനാരങ്ങ നീര്, കറുത്ത മുന്തിരി ജ്യൂസ്, വേവിച്ച പച്ചക്കറികള്‍ എന്നിവ കഴിക്കണമെന്നും ബാനര്‍ജി നിര്‍ദേശിച്ചു. ഫ്ളാക്സ് സീഡ് ഓയിലു കഴിക്കാവുന്നതാണ് ഇതോടൊപ്പം ബ്രൊക്കോളി കഴിക്കുന്നതും അഭികാമ്യമാണ്.രക്തത്തിലെ പ്ലേറ്റ്ലെറ്റുകള്‍ ഉത്പാദിപ്പിക്കാന്‍ സഹായിക്കുന്ന വിറ്റാമിന്‍ കെയുടെയും ആന്റിഓക്സിഡന്റുകളുടെയും ഏറ്റവും സമ്പന്നമായ ഉറവിടമാണിതെന്നും അവര്‍ പറഞ്ഞു.ഡെങ്കിരോഗ പ്രതിരോധത്തിന് ദേബ്ജാനി ബാനര്‍ജി പറഞ്ഞ മറ്റൊരു പഴമാണ് കിവി. ഇതില്‍ ഉയര്‍ന്ന അളവില്‍ വിറ്റാമിന്‍ എ, ഇ, പൊട്ടാസ്യം എന്നിവ അടങ്ങിയിട്ടുണ്ട്. ഈ അവശ്യ പോഷകങ്ങള്‍ ശരീരത്തിന്റെ ഇലക്ട്രോലൈറ്റിന്റെ അളവ് സന്തുലിതമാക്കുന്നു. ഇലക്ട്രോലൈറ്റുകളുടെ അസന്തുലിതാവസ്ഥ കാരണമുണ്ടാകുന്ന ഉയര്‍ന്ന രക്തസമ്മര്‍ദ്ദം പരിമിതപ്പെടുത്താന്‍ കിവിക്ക് കഴിയും. ഇത് പ്രതിരോധശേഷി ശക്തിപ്പെടുത്തുകയും ചെയ്യുമെന്നും അവര്‍ പറഞ്ഞു. രോഗപ്രതിരോധ ശേഷി വര്‍ധിപ്പിക്കുന്ന വെളുത്തുള്ളി മഞ്ഞള്‍ എന്നിവയും ഭക്ഷണത്തില്‍ ഉള്‍പ്പെടുത്താം.