പതിവായി ഓട്സ് കഴിച്ചോളൂ; ഗുണങ്ങള്‍ നിരവധി
ആരോഗ്യകാര്യങ്ങളില്‍ ജാഗ്രത പുലര്‍ത്തുന്നവരാണ് നാമെല്ലാം. അതിനാല്‍ തന്നെ ഡയറ്റുമായി ബന്ധപ്പെട്ട കാര്യങ്ങളിലും കരുതലോടെ ആയിരിക്കും മുന്നോട്ടുനീങ്ങുന്നത്. കഴിക്കാന്‍ തെരഞ്ഞെടുക്കുന്ന ഭക്ഷണങ്ങള്‍ , കഴിക്കുന്ന സമയം തുടങ്ങി ഡയറ്റുമായി ബന്ധപ്പെട്ട വിവിധ കാര്യങ്ങളില്‍ നാം ജാഗ്രത പുലര്‍ത്തിയിരിക്കും.
വണ്ണം കുറയ്ക്കാന് ശ്രമിക്കുന്നവര്‍ പതിവായി കഴിക്കുന്ന ഭക്ഷണമാണ് ഓട്ട്‌സ്. സാധാരണഗതിയില്‍ ഓട്ട്‌സ് നാം അപ്പപ്പോള്‍ തയ്യാറാക്കുകയാണ് പതിവ്. പാലില്‍ ചേര്‍ത്തോ വെള്ളത്തില്‍ ചേര്‍ത്തോ എല്ലാമാണ് പൊതുവെ ഓട്ട്‌സ് തയ്യാറാക്കാറുള്ളത്. പഴങ്ങള്‍, ഡ്രൈ ഫ്രൂട്ട്‌സ്, നട്ട്‌സ്, സീഡ്‌സ് എന്നിങ്ങനെയുള്ളവയും ഓട്ട്‌സില്‍ ചേര്‍ക്കാറുണ്ട്.
മറ്റ് പല ധാന്യങ്ങളേക്കാളും കൂടുതല്‍ നാരുകള്‍ അടങ്ങിയിരിക്കുന്ന ഭക്ഷണമാണ് ഓട്സ്. സാധാരണയായി, ഓട്സ് വെള്ളമോ പാലോ ഉപയോഗിച്ച് തിളപ്പിച്ചാണ് ഓട്സ് ഉണ്ടാക്കുന്നത്. ഒരു ബൗള്‍ ഓട്സ് ശരീരത്തിന് ആവശ്യമായ പ്രോട്ടീന്‍, സുപ്രധാന ഫാറ്റി ആസിഡുകള്‍, നാരുകള്‍, വിറ്റാമിന്‍ ഇ എന്നിവ നല്‍കുന്നു. ഹൃദയത്തെ സംരക്ഷിക്കുന്ന കാര്‍ബോഹൈഡ്രേറ്റ് ബീറ്റാ-ഗ്ലൂക്കന്‍ അടങ്ങിയിട്ടുണ്ട്. ഇത് കൊളസ്ട്രോളിന്റെ അളവ് കുറയ്ക്കുകയും ചെയ്യുന്നു.
ലയിക്കുന്ന ഫൈബറും ബീറ്റാ ഗ്ലൂക്കനും ഓട്സില്‍ കാണപ്പെടുന്നു. വെളുത്ത രക്താണുക്കള്‍ക്ക് ബീറ്റാ-ഗ്ലൂക്കന്‍ ആഗിരണം ചെയ്യാനുള്ള അതുല്യമായ റിസപ്റ്ററുകള്‍ ഉണ്ട്. ഡബ്ല്യുബിസികള്‍ ബീറ്റാ-ഗ്ലൂക്കന്‍ ഉത്തേജിപ്പിക്കുകയും അണുബാധകളെ പ്രതിരോധിക്കാന്‍ മികച്ച പ്രാപ്തി നല്‍കുകയും ചെയ്യുന്നു.
രാത്രി മുഴുവന്‍ കുതിര്‍ത്തുവച്ച ഓട്ട്‌സ് കഴിക്കുന്നത് കൊണ്ട് ഇരട്ടി ആരോഗ്യഗുണങ്ങളാണ് നമുക്ക് ലഭിക്കുക.
- മിക്കവരും നേരിടുന്ന ദഹനപ്രശ്‌നമാണ് മലബന്ധം. ഇത് വലിയ പരിധി വരെ പരിഹരിക്കാന്‍ രാത്രി മുഴുവന്‍ കുതിര്‍ത്തുവച്ച ഓട്ട്‌സ് സഹായകമാണ്. ഫൈബറിനാല്‍ സമ്പന്നമാണ് ഓട്ട്‌സ് എന്നതാണ് ഇതിന് കാരണം.
- ഷുഗര്‍ നില നിയന്ത്രിച്ചുനിര്‍ത്താനും ഓട്ട്‌സ് ഏറെ സഹായകമാണ്. ഭക്ഷണത്തില്‍ നിന്ന് നാം എടുക്കുന്ന ഷുഗറിന്റെ അളവ് കുറയ്ക്കാനാണ് ഇത് സഹായിക്കുക.
- വണ്ണം കുറയ്ക്കാന് ശ്രമിക്കുന്നവര്‍ക്ക് ഇത് ഗുണകരമാണ്. ഓട്ട്‌സിന് വിശപ്പിനെ ക്ഷമിപ്പിക്കാനുള്ള കഴിവ് ഏറെയാണ്. അതുകൊണ്ട് തന്നെ ദീര്‍ഘനേരം മറ്റ് ഭക്ഷണം കഴിക്കാതെ തുടരാന്‍ നമുക്ക് സഹായകമായിരിക്കും.
- സാപോനിന്‍, ബീറ്റ- ഗ്ലൂകാന്ഡ, പ്രോട്ടീന്‍ എന്നിവയാല്‍ സമ്പന്നമാണ് ഓട്ട്‌സ്. അതിനാല്‍, രാത്രി മുഴുവന്‍ കുതിര്‍ത്തുവച്ച ഓട്ട്‌സ കഴിക്കുന്നത് കൊണ്ട് മുടിയുടെ ആരോഗ്യത്തിനും ചില ഗുണങ്ങളുണ്ട്.
- ഹോര്‍മോണുകള്‍ ‘ബാലന്‍സ്’ ചെയ്ത് നിര്‍ത്തുന്നതിനും രാത്രിയില്‍ കുതിര്‍ത്തുവച്ച ഓട്ട്‌സ കഴിക്കുന്നത് ഗുണകരമാണ്.