ലോകത്ത് ജീവിച്ചിരുന്ന നമ്മുക്കറിയുന്ന ഏറ്റവും വലിയ ജീവി ഏതാണ്? ദിനോസറുകളെ കുറിച്ചാണ് നമ്മുടെ കേട്ടറിവ്. എന്നാല്‍ അതിലും വലിയ ജീവികളുണ്ടായിരുന്നു എന്നാണ് ഗവേഷകരുടെ ഏറ്റവും പുതിയ കണ്ടെത്തല്‍!!! അതും ദിനോസറുകളെപ്പോലും ഭക്ഷിച്ചിരുന്നവ!!!
ദിനോസറുകളെ ഭക്ഷിച്ചിരുന്ന കൂറ്റന്‍ ജീവികളുണ്ടായിരുന്നതായാണ് ഗവേഷകരുടെ വാദം. ദക്ഷിണാഫ്രിക്കയില്‍ നടന്ന പഠനങ്ങളിലാണ് ട്രൈയാസിക് കാലഘട്ടത്തില്‍ ഏതാണ്ട് 210 ദശലക്ഷം വര്‍ഷങ്ങള്‍ക്ക് മുന്‍പ് മുതലകളെപ്പോലെ വലിയ ജീവികള്‍ ദിനോസറുകളെ ഭക്ഷിച്ചിരുന്നതായി കണ്ടെത്തിയത്. റൗസുചിയാന്‍സ് എന്നാണ് ഇവയെ ഗവേഷകര്‍ വിശേഷിപ്പിക്കുന്നത്. കൂടുതല്‍ സസ്യാഹാരികളായ ദിനോസറുകളെയാണ് ഇവ ഭക്ഷിച്ചിരുന്നത്.
പുതുതായി കണ്ടെത്തിയ ഫോസിലുകളാണ് ജീവികള്‍ ഉണ്ടായിരുന്നു എന്ന് സ്ഥിരീകരിച്ചത്. പല്ലുകള്‍, കീഴ്ത്താടി, പേശികളുടെ കോശങ്ങള്‍ എന്നിങ്ങനെ നിരവധി തെളിവുകള്‍ ഗവേഷകര്‍ കണ്ടെത്തിക്കഴിഞ്ഞു.
മുതലകളോടായിരുന്നു ഈ ജീവികള്‍ക്ക് ഏറ്റവും അടുത്ത ബന്ധമെന്നാണ് ഗവേഷകര്‍ പറയുന്നത്. പത്ത് മീറ്ററോളം നീളവും വലിയ തലയോടും ആഴ്ന്നിറങ്ങാന്‍ പാകത്തിനുള്ള പല്ലുകളും ഇവയുടെ പ്രത്യേകതയായിരുന്നു.
അന്റാര്‍ട്ടിക്ക ഒഴികെ മറ്റുള്ള മുഴുവന്‍ ഭൂഖണ്ഡങ്ങളില്‍ നിന്നും ഇവയുടെ ഫോസിലുകള്‍ കണ്ടെത്തിയിട്ടുണ്ട്. അതായത് അന്റാര്‍ട്ടിക്ക് വൃത്തത്തിന് സമീപത്ത് വരെയുള്ള കാലാവസ്ഥയിലും പരിതസ്ഥിതിയിലുമാണ് ഇവ ജീവിച്ചിരുന്നത് എന്നാണ് വ്യക്തമാകുന്നത്.
ഈ കൂറ്റന്‍ ജീവികള്‍ ഇല്ലാതായതോടെ ഭൂമിയിലെ അടുത്ത വലിയ ജീവികള്‍ ദിനോസറുകളായി മാറിയത്രേ…