മേഘ കയാക്ക് ഫെസ്റ്റിവലിന് ഒരുങ്ങി മേഘാലയ

നാല് ദിവസം നീണ്ടുനില്‍ക്കുന്ന മെഗാ ഗ്ലോബല്‍ അഡ്വഞ്ചര്‍ സ്പോര്‍ട്സ് ”മേഘ കയാക് ഫെസ്റ്റിവല്‍ 2022” ഒക്ടോബര്‍ 13ന് ഉംതാം വില്ലേജിലെ മനോഹരമായ ഉംട്രൂ നദിയില്‍ ആരംഭിക്കാന്‍ മേഘാലയ ഒരുങ്ങി. ഇന്ത്യന്‍ ഉപഭൂഖണ്ഡത്തിലെ ഏറ്റവും വലിയ കയാക്കിംഗ് ഇവന്റ് എന്നറിയപ്പെടുന്ന ‘മേഘ കയാക്ക് ഫെസ്റ്റിവല്‍’ 2022 പതിപ്പിന് 20 രാജ്യങ്ങളില്‍ നിന്നുള്ള 100-ലധികം പേര്‍ കയാക്കിംഗ് ഫെസ്റ്റിവലില്‍ പങ്കെടുക്കുന്നുണ്ട്. 

പ്രൊഫഷണലുകള്‍ക്കും ഇന്റര്‍മീഡിയറ്റ്/അമേച്വര്‍ റേസര്‍മാര്‍ക്കുമായി ഡൗണ്‍റിവര്‍ ടൈം ട്രയല്‍, എക്സ്ട്രീം സ്ലാലോം, ഡൗണ്‍റിവര്‍ ഫ്രീസ്‌റ്റൈല്‍ എന്നിങ്ങനെ മൂന്ന് മത്സര വിഭാഗങ്ങളിലായി വൈറ്റ് വാട്ടര്‍ കയാക്കിംഗ് ഇവന്റുകള്‍ ഫെസ്റ്റിവലില്‍ നടത്തപ്പെടും.

ബെത്ത് മോര്‍ഗന്‍, നൂറിയ ന്യൂമാന്‍, സോഫിയ റെനിസോ, ജിയോവാനി ഡി ജെന്നാരോ, ആന്‍ഡി ബ്രണ്ണര്‍ തുടങ്ങിയ പ്രമുഖ കയാക്കിങ് അത്‌ലറ്റുകളും നിരവധി അന്താരാഷ്ട്ര കയാക് അത്ലറ്റുകളും ഫെസ്റ്റിവലില്‍ പങ്കെടുക്കുന്നുണ്ട്. അന്താരഷ്ട്ര കയാക് അത്ലിറ്റുകള്‍ക്കു പുറമെ മുന്‍നിര കയാക്കിംഗ് സംസ്ഥാനങ്ങളായ ഉത്തരാഖണ്ഡ് കര്‍ണാടാക, കേരളം എന്നിവിടങ്ങളില്‍ നിന്നുള്ള പെഡലര്‍മാരായ അമിത് മഗര്‍, ആഷു റാവത്ത്, ആനി മത്തിയാസ്, നിസ്ഫുല്‍ ജോസ്, മനീഷ് റാവത്ത്, പിങ്കി റാണ, നൈന അധികാരി എന്നിവരും പങ്കെടുക്കുന്നു.  

ലോകത്തെ മികച്ച വൈറ്റ്-വാട്ടര്‍ സ്‌പോര്‍ട്‌സ് ഡെസ്റ്റിനേഷനുകളിലൊന്നായി മേഘാലയയെ ഉയര്‍ത്തിക്കാട്ടുക എന്ന ലക്ഷ്യത്തോടെ മേഘാലയ ടൂറിസം ആണ്  ‘മേഘ കയാക്ക് ഫെസ്റ്റിവല്‍’ സംഘടിപ്പിക്കുന്നത്. മേഘാലയയിലെ ശുദ്ധവും വേഗത്തിലുള്ളതുമായ നദികള്‍ വൈറ്റ് വാട്ടര്‍ റാഫ്റ്ററുകള്‍ക്കും കയാക്കര്‍മാര്‍ക്കും ഒരു പറുദീസയാണ്. ആവേശകരമായ ഈ ഫെസ്റ്റിവലില്‍ പങ്കെടുക്കുന്നത് ഒരു ജീവിതാനുഭവം മാത്രമല്ല, കയാക്കിംഗില്‍ താല്‍പ്പര്യം പങ്കിടുന്ന ലോകമെമ്പാടുമുള്ള ആളുകളുമായി നെറ്റ്വര്‍ക്ക് ചെയ്യാനുള്ള അവസരവും നല്‍കുന്നു. ജല കായിക വിനോദങ്ങളില്‍ സ്ത്രീകളുടെ പങ്കാളിത്തം പ്രോത്സാഹിപ്പിക്കുക എന്ന മുദ്രാവാക്യമാണ് ഈ പരിപാടിയുടെ മറ്റൊരു സവിശേഷത. ഈ ലക്ഷ്യം നിറവേറ്റുന്നതിനായി, അന്താരാഷ്ട്ര വിദഗ്ധരുടെ നേതൃത്വത്തില്‍ നിരവധി പരിശീലന സെഷനുകള്‍ സ്ത്രീകള്‍ക്ക് മാത്രമായി സംഘടിപ്പിക്കുന്നുണ്ട്.