ശരീരത്തിനാവശ്യമായ ഉയരം ആഗ്രഹിക്കുന്നവരാണ് നമ്മൾ എല്ലാവരും. ഉയരം കുറഞ്ഞവരാകട്ടെ ഉയരം വർധിപ്പിക്കാൻ വേണ്ട വ്യായാമങ്ങളും പരീക്ഷണങ്ങളും തേടിപ്പോകുന്നു. എന്നാൽ ഉയരക്കൂടുതൽ കാരണം പരിഹാസത്തിന് ഇടയായവരും ഒട്ടേറെയാണ്. ഇന്ത്യൻ ഗുസ്തി താരം ദലിപ് സിംഗ് റാണ എന്ന ‘ദി ഗ്രേറ്റ് ഖാലി’യേക്കാൾ ഉയരമുള്ള ഒരു പെൺകുട്ടിയെക്കുറിച്ചാണ് നമ്മൾ ഇവിടെ സംസാരിക്കുന്നത്. ഈ പെൺകുട്ടിയും അവളുടെ ഉയരത്തിന്റെ പേരിൽ പലതവണ പരിഹാസങ്ങൾക്ക് പാത്രമായി. ഒട്ടേറെ റെക്കോർഡുകളുടെ പേരിൽ ഈ പെൺകുട്ടിയുടെ പേര് ഗിന്നസ് റെക്കോർഡ്സിൽ ഇടംപിടിച്ചിട്ടുണ്ട്.
ലോകത്തിലെ ഏറ്റവും ഉയരം കൂടിയ പെൺകുട്ടി തുർക്കി സ്വദേശിയായ റുമേസ ഗെൽഗി ആണ്. വീവർ സിൻഡ്രോം എന്ന ജനിതക തകരാറാണ് റുമേസയുടെ ഉയരക്കൂടുതലിന് കാരണം. ആരാണ് ഈ പെൺകുട്ടി, എന്താണ് വീവർ സിൻഡ്രോം? എന്നതിനെക്കുറിച്ച് കൂടുതൽ അറിയാം.
25 വയസ്സുകാരിയായ റുമേസയുടെ ഉയരം 7 അടി 7 ഇഞ്ചും ദലിപ് സിംഗ് റാണ എന്ന ‘ദ ഗ്രേറ്റ് ഖാലി’യുടെ ഉയരം 7 അടി 1 ഇഞ്ചുമാണ്. മൂന്ന് ലോക റെക്കോർഡുകളാണ് റുമേസയുടെ പേരിലുള്ളത്. ജീവിച്ചിരിക്കുന്ന ഒരു വ്യക്തിയുടെ (സ്ത്രീ) ഏറ്റവും നീളമുള്ള കൈവിരൽ- 4.4 ഇഞ്ച്. ജീവിച്ചിരിക്കുന്ന ഒരു വ്യക്തിയുടെ (സ്ത്രീ) ഏറ്റവും വലിയ കൈകൾ- വലത് കൈ 9.81 ഇഞ്ച്, ഇടത് കൈ 9.55 ഇഞ്ച്.ജീവിച്ചിരിക്കുന്ന ഒരു വ്യക്തിയുടെ ഏറ്റവും നീളമേറിയ മുതുക്- 23.58 ഇഞ്ച് എന്നിങ്ങനെ മൂന്ന് റെക്കോർഡുകളാണ് റുമേസ നേടിയത്. ഉയരം കാരണം വേഗത്തിൽ നടക്കാൻ കഴിയാത്തതിനാൽ റുമേസ വീൽചെയറോ വാക്കിംഗ് സ്റ്റിക്കോ ഉപയോഗിക്കുന്നു. ഭക്ഷണം കഴിക്കുമ്പോൾ വലാറി സാവധാനം മാത്രമേ കഴിക്കാൻ പാടുള്ളു അല്ലാത്തപക്ഷം ഭക്ഷണം തൊണ്ടയിൽ കുടുങ്ങിപ്പോകും. ഇതോടൊപ്പം ശ്വസിക്കുന്നതിലും നിൽക്കുന്നതിലും ഏറെ പ്രശ്‌നങ്ങളുമുണ്ട്.
അസ്ഥികൾ സാധാരണയേക്കാൾ വളരെ വേഗത്തിൽ വളരുന്ന ഒരു അപൂർവ ജനിതക അവസ്ഥയാണ് വീവേഴ്സ് സിൻഡ്രോം. വീവേഴ്സ് സിൻഡ്രോം ഉള്ള ആളുകൾ സാധാരണയായി വളരെ ഉയരമുള്ളവരായിരിക്കും. അവരുടെ മുഖത്തെ പേശികൾ വളരും. വിശാലമായ കണ്ണുകൾ, നീളമുള്ള മൂക്ക്, വിശാലമായ നെറ്റി എന്നിങ്ങനെ വളർച്ച അവരുടെ മുഖത്തെയും ബാധിക്കും. പല സന്ദർഭങ്ങളിലും, ചിന്തിക്കാനും മനസ്സിലാക്കാനുമുള്ള കഴിവും ഇത്തരക്കാരിൽ കുറയും. ഇതിന് ചികിത്സയില്ലെങ്കിലും, ഈ അവസ്ഥയുള്ള ആളുകൾക്ക് ആരോഗ്യകരമായ ജീവിതം നയിക്കാൻ കഴിയും.