വീടുവയ്ക്കുമ്പോള്‍ പരിസ്ഥിതിയോട് സ്‌നേഹം കാണിക്കാത്ത പ്രവണതയാണ് നമ്മളില്‍ പലരും പിന്‍തുടരുന്നത്. വീട്ടിലും മുറ്റത്തും ടൈല്‍സ് പതിപ്പിച്ച് പിന്നെ സ്ഥലമില്ലെന്നു പറഞ്ഞ് പ്രകൃതിയോട് പറയും നോ. എന്നാല്‍ ഈ രീതി നല്ലതല്ല. ഇതിനു പരിഹാരമുണ്ട്.
പരിമിതമായ സ്ഥലത്ത് എങ്ങനെ ഭംഗിയുള്ള പൂന്തോട്ടമൊരുക്കാം എന്ന ചിന്തയുടെ ഫലമാണ് വെര്‍ട്ടിക്കല്‍ ഗാര്‍ഡനിംഗ്. മതിലില്‍ ഒരുക്കുന്ന പൂന്തോട്ടം എന്ന് വെര്‍ട്ടിക്കല്‍ ഗാര്‍ഡനെ ഒറ്റവാക്കില്‍ വിശേഷിപ്പിക്കാം. വീടിന്റെ പുറം ചുമര്‍ മുതല്‍ അകത്തളം വരെ എളുപ്പത്തില്‍ പരീക്ഷിക്കാവുന്ന പൂന്തോട്ടമാണിത്. ഒരു സ്‌ക്വയര്‍ ഫീറ്റില്‍ പത്തുമുതല്‍ പതിനഞ്ച് ചെടികള്‍ വരെ വയ്ക്കാന്‍ സാധിക്കും.
പ്രത്യേകം തയാറാക്കിയ ഫ്രെയിമുകള്‍ മതിലില്‍ ഉറപ്പിച്ച് ചെടിച്ചട്ടികള്‍ ഇതിലേക്ക് ഇറക്കിവെച്ച്, അതുമല്ലെങ്കില്‍ മതിലില്‍ തന്നെ ചെടിനടാനുള്ള പ്രതലം സജ്ജമാക്കിയും ആണ് വെര്‍ട്ടിക്കല്‍ ഗാര്‍ഡന്‍ തയ്യാറാക്കുന്നത്. ഇത്തരം പോളി പ്രൊപ്പിലിന്‍ നിര്‍മ്മിതമായ നിരവധി മോഡ്യൂളുകള്‍ ചേര്‍ത്തു വെച്ച് ആവശ്യാനുസരണം വലിപ്പമേറിയ വെര്‍ട്ടിക്കല്‍ ഗാര്‍ഡന്‍ വാളുകള്‍ വരെ സൃഷ്ടിക്കാന്‍ കഴിയും.
സിങ്കോണിയം, ഫിലോഡെന്‍ഡ്രോണ്‍, ബ്രോമിലിയാര്‍ഡ്‌സ്, റിയോ, ഡ്രസീനിയ, ക്ലോറോഫൈറ്റം, അസ്പരാഗസ് ഫേണ്‍സ്, ബോസ്റ്റോണ്‍ ഫേണ്‍സ് തുടങ്ങിയ ചെടികളാണ് വെര്‍ട്ടിക്കല്‍ ഗാര്‍ഡനില്‍ സാധാരണയായി ഉപയോഗിക്കുന്നത്. ചെടികളുടെ ഇലകള്‍ക്ക് നല്ല നിറം ലഭിക്കാനായി ഇവയുടെ ചുവട്ടില്‍ ഓര്‍ഗാനിക്ക് ന്യൂട്രിയന്റ്സ് ഇട്ടുകൊടുക്കാം.
ഭിത്തിയില്‍ മാത്രമല്ല, വരാന്ത, ബാല്‍ക്കണി , സ്വീകരണമുറി, എന്നിവിടങ്ങളിലൊക്കെ വെര്‍ട്ടിക്കല്‍ ഗാര്‍ഡന്‍ ഒരുക്കാം. നേരിട്ടു സൂര്യപ്രകാശം ലഭിക്കുന്ന സ്ഥലങ്ങളാണ് ഇതിനു പറ്റിയ ഇടങ്ങള്‍. വീടിനുള്ളില്‍ നടുമുറ്റത്തിന്റെ ഭിത്തികളിലും ഇവ ഒരുക്കാം.
സ്ഥല പരിമിതിയ്ക്കൊരു പരിഹാരം എന്നത് മാത്രമല്ല ഇക്കാലത്ത് വെര്‍ട്ടിക്കല്‍ ഗാര്‍ഡനുകളുടെ മേന്മ. മുറിയ്ക്കുള്ളില്‍ വായുസഞ്ചാരം കൂട്ടാനും, ചൂടുകൂടുന്ന കാലാവസ്ഥയില്‍ തണുപ്പ് നിറയ്ക്കാനും വെര്‍ട്ടിക്കല്‍ ഗാര്‍ഡനുകള്‍ക്ക് കഴിയുന്നു.