അന്താരാഷ്ട്ര പുരസ്കാരമായ സാറ്റേൺ സ്വന്തമാക്കി എസ്എസ് രാജമൗലി സംവിധാനം ചെയ്ത ‘ആർ ആർ ആർ’. ആർ ആർ ആറിന്റെ ഒഫിഷ്യൽ ട്വിറ്റർ പേജിലൂടെയാണ് ഇക്കാര്യം അറിയിച്ചത്. സിനിമയ്ക്ക് വേണ്ടി പ്രവർത്തിച്ച എല്ലാ ടീമിനും ആശംസകൾ അറിയിക്കുന്നു എന്നാണ് കുറിച്ചിരിക്കുന്നത്.
അക്കാദമി ഓഫ് സയൻസ് ഫിക്ഷൻ, ഫാന്റസി ആൻഡ് ഹൊറർ ഫിലിംസ് വർഷം തോറും നൽകുന്ന അമേരിക്കൻ പുരസ്കാരമാണ് സാറ്റേൺ അവാർഡ്. സയൻസ് ഫിക്ഷൻ, ഫാന്റസി, സിനിമ, ഹൊറർ എന്നീ വിഭഗത്തിലുള്ള സിനിമകളെയാണ് അവാർഡിനായി പരിഗണിക്കുക.
ബാഹുബലി’ക്ക് ശേഷം രാജമൗലി ഒരുക്കുന്ന ബ്രഹ്മാണ്ഡ ചിത്രമാണ് രൗദ്രം രണം രുദിരം (ആര്‍ആര്‍ആര്‍). 450 കോടി ബജറ്റില്‍ ഒരുങ്ങിയ ചിത്രത്തില്‍ രാംചരണും ജൂനിയര്‍ എൻ.ടി.ആറും പ്രധാന വേഷത്തിലെത്തുന്നു, 1920കളിലെ അല്ലൂരി സീതാരാമ രാജു (രാം ചരൺ), കോമരം ഭീം (ജൂനിയര്‍ എൻ.ടി.ആർ.) എന്നീ സ്വാതന്ത്യസമരസേനാനികളുടെ കഥയാണ് ചിത്രം പറയുന്നത്. സ്വാതന്ത്ര്യത്തിനു മുമ്പ് തെലങ്കാനയിലെ ആദിവാസി പോരാട്ടങ്ങള്‍ക്ക് നേതൃത്വം കൊടുത്തവരാണ് കൊമരം ഭീം, അല്ലുരി സീതാരാമ രാജു എന്നിവർ.
ആലിയ ഭട്ട്, അജയ് ദേവ്ഗൺ, ബ്രിട്ടീഷ് നടി ഡെയ്‌സി എഡ്ജര്‍ ജോണ്‍സ് എന്നിവരും ചിത്രത്തിൽ പ്രധാന കഥാപാത്രങ്ങളാകുന്നു. മാര്‍ച്ച് 25 ന് റിലീസ് ചെയ്ത ചിത്രം 1150 കോടിയാണ് ബോക്‌സ്ഓഫിസില്‍ നിന്ന് സ്വന്തമാക്കിയത്.