മലയാളി പ്രേക്ഷകരുടെ പ്രിയപ്പെട്ട താരജോഡികളാണ് പ്രണവ് മോഹന്‍ലാലും കല്യാണി പ്രിയദര്‍ശനും . വിനീത് ശ്രീനിവാസന്‍ സംവിധാനം ചെയ്ത ‘ഹൃദയം’ എന്ന സൂപ്പര്‍ഹിറ്റ് ചിത്രത്തിലെ ഇരുവരുടെയും കെമിസ്ട്രി പ്രേക്ഷകര്‍ ഇരുകയ്യും നീട്ടിയാണ് സ്വീകരിച്ചത്. ഇപ്പോള്‍ ഇതാ പ്രണവും കല്യാണിയും വീണ്ടും ഒന്നിക്കാന്‍ പോകുകയാണെന്ന വിവരമാണ് പുറത്തുവരുന്നത്.
ഹൃദയത്തിന് ശേഷം പ്രണവ്-കല്യാണി ജോഡികള്‍ വീണ്ടും ഒന്നിക്കുന്നുവെന്ന വിവരം കലാ സംവിധായകന്‍ പ്രശാന്ത് അമരവിളയാണ് പുറത്ത് വിട്ടത്. ഹൃദയത്തിന്റെ കലാ സംവിധായകനായിരുന്നു പ്രശാന്ത്. നേരത്തെ തന്നെ പ്രണവും കല്യാണിയും വീണ്ടും ഒന്നിക്കുന്നുവെന്ന വാര്‍ത്ത പുറത്തുവന്നിരുന്നു. അഞ്ജലി മേനോന്‍ ചിത്രത്തിലാണോ ഇരുവരും വീണ്ടും എത്തുന്നത് എന്നാണ് ആരാധകര്‍ ഉറ്റുനോക്കുന്നത്.
പ്രിയദര്‍ശന്‍ സംവിധാനം ചെയ്ത മരക്കാര്‍ അറബിക്കടലിന്റെ സിംഹം എന്ന ചിത്രത്തിലാണ് പ്രണവും കല്യാണിയും ആദ്യമായി ഒരുമിച്ച് അഭിനയിച്ചത്. പിന്നീട് പുറത്തിറങ്ങിയ ഹൃദയം എന്ന ചിത്രം ബോക്‌സ് ഓഫീസില്‍ വലിയ നേട്ടമുണ്ടാക്കുകയും ചെയ്തിരുന്നു. അരുണും നിത്യയും തമ്മിലുള്ള രസകരമായ നിമിഷങ്ങളും ഗാനരംഗങ്ങളുമെല്ലാം പ്രേക്ഷകര്‍ വലിയ ആവേശത്തോടെയാണ് സ്വീകരിച്ചത്.