ആസിഫ് അലിയെ (Asif Ali) നായകനാക്കി ജീത്തു ജോസഫ് (Jeethu Joseph) സംവിധാനം ചെയ്ത ചിത്രം ‘കൂമന്‍’ ഇന്ന് തിയേറ്ററുകളില്‍ എത്തിയിരിക്കുകയാണ്. ആദ്യ ദിനം തന്നെ മികച്ച പ്രേക്ഷക പ്രതികരണമാണ് ചിത്രത്തിന് ലഭിക്കുന്നത്. മലയാളത്തില്‍ ത്രില്ലര്‍ സിനിമകള്‍ എടുക്കാന്‍ ജീത്തു ജോസഫിനെ കഴിഞ്ഞേ ആളുള്ളൂ എന്നാണ് സോഷ്യല്‍ മീഡിയ പറയുന്നത്. ആദ്യ പകുതി ഗംഭീരമാണെങ്കില്‍ രണ്ടാം പകുതി അതിഗംഭീരമാണെന്ന് പ്രേക്ഷകര്‍ പറയുന്നു. ആദ്യ പകുതിയില്‍ പ്രേക്ഷകരില്‍ ഒരുപാട് സംശയങ്ങള്‍ നിരത്തും. ഇന്റര്‍വല്‍ ബ്ലോക്ക് ഗംഭീരം. രണ്ടാം പകുതി സംശയങ്ങള്‍ക്ക് പൂര്‍ണമായ ഉത്തരങ്ങള്‍ നല്‍കുകയും അതിനൊപ്പമുള്ള ക്ലൈമാക്‌സും ശരിക്കും ഞെട്ടിച്ചെന്നാണ് ചിത്രം കണ്ടിറങ്ങിയവര്‍ അഭിപ്രായപ്പെടുന്നത്.
ചിത്രത്തിലെ ആസിഫ് അലിയുടെ പ്രകടനമാണ് ഏവരും എടുത്തു പറയുന്നത്. സമീപ കാലത്ത് വന്നതില്‍ മികച്ച സിനിമയാണ് കൂമനെന്നും മികച്ച പ്രകടനമാണ് ആസിഫ് അലി കാഴ്ച വെച്ചതെന്നും അഭിപ്രായപ്പെടുന്നവരാണ് ഭൂരിഭാഗവും. ഫിലിം ക്രിട്ടിക്‌സിനെയും സാധാരണ പ്രേക്ഷകരെയും ഒരുപോലെ തൃപ്തിപ്പെടുത്തുന്ന ചിത്രമാണ് കൂമന്‍. ഒരു ഇടവേളയ്ക്ക് ശേഷം ആസിഫ് അലി തിരിച്ചുവന്നിരിക്കുന്നു എന്നെല്ലാമാണ് പ്രേക്ഷകര്‍ ചൂണ്ടിക്കാട്ടുന്നത്.